والمحصنٰت پارہ-5 مختصر مضامین

أَعُوْذُ بِاﷲِ مِنَ الشَّيْطٰنِ الرَّجِيْمِ

بِسْمِ ﷲِ الرَّحْمٰنِ الرَّحِيْمِ۔

1-شوہر اور بیوی کے معاملات

ارشادِ باری تعالٰی ہے کہ مرد عورت پر حاکم ھے، اس لیے کہ ﷲﷻ نےبعض کو بعض سے افضل بنایا ہے اس لیے بھی کہ مرد اپنا مال خرچ کرتے ہیں۔ تو جو نیک بیبیاں ہیں وہ مردوں کے حکم پر چلتی ہیں۔ان کی پیٹھ پیچھے مال وآبرو کی حفاظت کرتی ہیں۔ جن عورتوں کے بارے میں تمھیں معلوم ہوکہ سرکشی کرنے لگی ہیں ان کو سمجھاؤ، اگر نہ سمجھیں تو بستر الگ کردو اگر پھر بھی باز نہ آئیں تو زد و کوب کرو۔ اگر فرمانبردار بن جائیں تو ایذا دینے کا بہانہ نہ ڈھونڈو۔

2-دین کا خلاصہ اور حسن سلوک کے حقدار

دین کا خلاصہ یہ ہے کہ ﷲﷻ ہی کی عبادت کرو،اور اس کی ذات، صفات وعبادات میں کسی کو اس کا شریک نہ ٹھہراؤ۔ اور ماں باپ اور قریبی رشتہ داروں، یتیموں، مسکینوں، قریبی و اجنبی ہمسائیوں، ہمنشینوں، مسافروں اور غلاموں سے حسنِ سلوک کرو۔کیونکہ اللّٰہ تعالٰی متکبر، شیخی خوروں کو اپنا دوست نہیں رکھتا۔

3-سلام کرنے کا حکم

اسلام کا سب سے بڑا معاشرتی ادب یہی ھے کہ ہر مسلمان دوسرے مسلمان کو سلام کرے اور دوسرا سلام کا جواب ویسا ہی دے یا اس سے زیادہ دے۔جب کوئی مسلمان السلام علیکم کہے اس کا بہتر جواب وعلیکم السلام ورحمتہ اللہ ہے اور جو السلام علیکم ورحمتہ اللہ کہے اس کا جواب وعلیکم السلام ورحمتہ اللہ وبرکاتہ ہے اور جب السلام علیکم ورحمتہ اللہ وبرکاتہ کہےتو جواب وعلیکم ہے۔ اس سے پیار ومحبت بڑھتا ہے اور بھائ چارہ پیدا ہوتا ہے۔

4-شرک ناقابلِ معافی جرم ھے

اللّٰہ تعالیٰ اپنے ساتھ شریک کئے جانے کے گناہ کو نہیں بخشتا چاہے وہ ذات،صفات یا اختیارات میں شرک ہو۔اس جرم کے سوا اور گناہوں کو خواہ کیسے ہی ہوں بخش دیتا ہے۔

5-قرآن کریم پر غور وفکر کی دعوت

اللّٰہ تعالیٰ اپنے بندوں کو حکم دیتاہے کہ وہ قرآن کو غور وفکر، تامل وتدبر سے پڑھیں، ایک اور جگہ فرماتا ہے یہ لوگ کیوں قرآن میں غور وفکر نہیں کرتے۔ کیا ان کے دلوں پر تالے لگ گئے ہیں۔

(سورہ النساء)