وضو کی فضیلت

ارشاد نبوی ﷺ ھے" مومن جب وضو کرتا ھے اور چہرہ دھوتا ھے تو پانی یا آخری قطرہ پانی کے ساتھ اس کے چہرے سے سارے گناہ ساقط ھوجاتا ہیں, جن کی طرف اس نے اپنی آنکھوں سے دیکھا تھا, اور جب ہاتھ دھوتا ھے تو پانی یا آخری قطرہ پانی کے ساتھ اس کے ہاتھوں کے گناہ گرجاتے ہیں,  جنھیں اس کے ہاتھوں نے پکڑا تھا۔ اور جب پاؤں دھوتا ھے تو پانی یا آخری قطرہ پانی کے ساتھ اس کے پاؤں کے گناہ گرجاتے ہیں جن کی طرف اس کے پاؤں چل کر گئے تھے حتی کہ (وضو کے بعد) وھ گناہوں سے صاف ہوکر نکل جاتا ھے۔

صحیح مسلم 244

صلاة توبہ

ارشاد نبوی ﷺ ھے" جب کوئی آدمی گناہ کرتا ھے, پھر وضو کرتا ھے اور دو رکعت نماز پڑھ کر اللہ سے بخشش کا طالب ہوتا ھے تو اللہ  سبحانہ و تعالٰی  اسے معاف کردیتا ہے۔

جامع الترمذی 406

لا اله الا اللہ کی تلقین

رسول اللہ ﷺ کا ارشاد عالی ھے" اپنے مرنے والوں کو " لا اله الا اللہ" کی تلقین کرو۔ 1 ۔ جس کا آخری کلام " لا اله الا اللہ" ہوا  وہ جنت میں داخل ھوگا۔2۔
جب ایک مسلمان محسوس کرے کہ اس کے بھائی کی موت کا وقت قریب ھے تو اسے کلمہ اخلاص کی تلقین کرے, یعنی اسے " لا اله الا اللہ" کہنے کاحکم دیں, اسے تلقین کرے, اسی طرح اس کا ورد اس کے سامنے شروع کردے تاکہ اسے یاد آجائے اور وھ بھی یہ کلمہ مبارک کہہ لے جب وہ " لا اله الا اللہ" اپنی زبان سے کہے تو پھر تلقین سے رک جائے۔ ہاں,  اگر اس کے بعد اس نے کوئی اور بات کہہ دی تو پھر تلقین شروع کرے, کوشش یہ ھو کہ آخری لفظ اس کی زبان پر یہی کلمہ " لا اله الا اللہ" ہو, تاکہ وھ جنت میں داخل ھوجائے۔

1۔ صحیح مسلم  916
2۔ سنن ابی داؤد  3116

شرک اصغر

ارشاد نبی کریم ﷺ ھے"سب سے زیادہ خطرناک چیز جس کا میں تم پر خطرہ محسوس کرتا ہوں,  چھوٹا شرک ھے۔ لوگوں نے پوچھا: اے اللہ کے رسول ﷺ ! شرک اصغر کیا ھے؟ آپ ﷺ نے فرمایا:وہ دکھاوا ھے۔ اللہ عزوجل قیامت کے دن جب بندوں کو ان کے اعمال کا بدلہ دیاجائے گا تو فرمائیں گے: "جن کو دکھانے کے لئیے تم نے عمل کئے تھے, ان کے پاس جاؤ, پھر دیکھو وہاں تمھیں کوئی صلہ ملتا ھے۔" مسند احمد 428/5

جھوٹی قسم کی سزا

ارشاد نبوی ﷺ  ھے"جس نے اپنی قسم کے ذریعے سے کسی مسلمان کا حق مار لیا, اللہ نے اس کے لئے جہنم واجب اور بہشت حرام کردی ھے , " ایک شخص نے عرض کیا: اے اللہ کے رسول ﷺ ! چاہے وہ معمولی حق ھو, فرمایا: " چاہے پیلو کے درخت کی ایک ٹہنی ہی ہو"۔

صحیح مسلم 137

جمعہ کے دن دعا کی قبولیت

ارشاد نبوی ﷺ  ھے"جمعہ کے دن میں ایک ایسا وقت ھے کہ جب کوئی مسلمان اللہ کا بندہ اس میں اللہ عزوجل سے اچھائی کا سوال کرے تو یقینا اسے دیتا ھے۔ 1 بعض روایات میں ھے کہ یہ وقت امام کے خطبے کے لئے بیٹھنے سے لے کر نماز سے فارغ ہونے تک کے درمیان میں ھے2۔ اور بعض کا قول یہ ھے کہ یہ عصر کے بعد ھے3۔
1۔ صحیح مسلم
2۔ صحیح مسلم
3۔ سنن ابن ماجہ

نماز جنازہ کا ثواب

ارشاد نبوی ﷺ  ھے"جو شخص ایمان کے ساتھ اور ثواب کی نیت سے کسی مسلمان کے جنازے کے ساتھ چلا, پھر نماز جنازہ اور دفن تک اس کے ساتھ رہا تو وہ دو قیراط ثواب کے ساتھ واپس آیا, ایک قیراط احد پہاڑ کے مثل ھے, جو شخص اس کی نماز جنازہ پڑہ کر دفن سے قبل ہی لوٹ آیا تو وہ ایک قیراط ثواب کے ساتھ واپس آیا۔ صحیح البخاری 47