صلح کروانے کی اہمیت

بِسْمِ ﷲِ الرَّحْمٰنِ الرَّحِيْمِ

ہمارے پیارے نبی حضرت محمد مصطفٰی ﷺ نے فرمایا: جس شخص نے دو آدمیوں میں صلح کروانے کی خاطر بات بنا کر کہی ہو، اس نے جھوٹ نہیں بولا ۔

سنن ابوداؤد 4920 (صحیح)

ﷲﷻ ذات، صفات، اختیارات اور معاملات میں یکتا ہے

بِسْمِ ﷲِ الرَّحْمٰنِ الرَّحِيْمِ

ایک آدمی نے نبی کریم ‌صلی ‌اللہ ‌علیہ ‌وآلہ ‌وسلم ‌ سے کہا: جو کچھ ﷲ چاہے اور آپﷺ چاہیں۔ آپ ﷺ ‌ نے اسے فرمایا: کیا تونے مجھے ﷲ تعالٰی کے ساتھ شریک کردیا ہے، صرف (وہ ہوتا ہے) جو یکتا و یگانہ ﷲ چاہتا ہے۔ 

مسند احمد 10

توبہ کا دروازہ ہمیشہ کھلا ھے

بِسْمِ ﷲِ الرَّحْمٰنِ الرَّحِيْمِ

رَحْمَۃً لِّلْعَالَمِیْن رسولِ کریم ﷺ نے فرمایا: اگر تم اتنی غلطیاں کرو کہ تمھاری غلطیاں آسمان تک پہنچ جائیں، پھر توبہ کرو تو ( پھر بھی ) ﷲﷻ تمھاری توبہ قبول فرمائے گا۔

سنن ابنِ ماجہ 4248 (صحیح)

دُعائیں جو رد نہیں ہوتی

بِسْمِ ﷲِ الرَّحْمٰنِ الرَّحِيْمِ

 ہمارے پیارے نبی حضرت محمد مصطفٰی ﷺ نے فرمایا: تین دعائیں قبول ہوتیں ہیں ۔ ان ( کی قبولیت ) میں کوئی شک نہیں: مظلوم کی دُعا، مسافر کی دُعا اور والد کی اپنی اولاد کے حق میں دُعا ۔

سنن ابنِ ماجہ 3862 (صحیح)

وضو سے پہلے بسم اللّٰہ کا بیان

بِسْمِ ﷲِ الرَّحْمٰنِ الرَّحِيْمِ

 رَحْمَۃً لِّلْعَالَمِیْن رسولِ کریم ﷺ نے فرمایا: جس کا وضو نہیں اس کی نماز نہیں اور جو شخص وضو کے شروع میں ﷲ کا نام نہ لے ( بسم الله نہ پڑھے ) اس کا وضو نہیں ۔  

سنن ابوداؤد 101 (صحیح)

دعوتِ ولیمہ کی اہمیت

بِسْمِ ﷲِ الرَّحْمٰنِ الرَّحِيْمِ

 رَحْمَۃً لِّلْعَالَمِیْن رسولِ کریم ﷺ نے فرمایا جب تم میں سے کسی کو دعوتِ ولیمہ پر بلایا جائے تو اسے آنا چاہئے۔ معلوم ہوا کہ دعوت ولیمہ کا قبول کرنا ضروری ہے ۔

صحیح البخاری 5173 (صحیح)

آپس میں سلام کو پھیلاؤ

بِسْمِ ﷲِ الرَّحْمٰنِ الرَّحِيْمِ

رسول کریم ﷺ نے فرمایا: تم اس وقت تک جنت میں داخل نہیں ہوسکتے جب تک تم مومن نہیں بن جاتے، تم اس وقت تک مومن نہیں بن سکتے جب تک تم باہم محبت نہیں کرتے، کیا میں تمہیں ایسی چیز نہ بتاؤں ! جب تم اسے کرنے لگ جاؤ گے تو تمہاری باہم محبت ہوجائے، آپس میں سلام پھیلاؤ۔

مشکوٰۃ 4631

لَاحَوْلَ وَلَا قُوَّۃَ إِلَّا بِاللّٰہِ کی فضیلت

بِسْمِ ﷲِ الرَّحْمٰنِ الرَّحِيْمِ

 ہمارے پیارے نبی حضرت محمد مصطفٰیﷺ نے فرمایا: زیادہ سے زیادہ لَاحَوْلَ وَلَا قُوَّۃَ إِلَّا بِاللّٰہِ کہا کرو، کیونکہ یہ جنت کے خزانوں میں سے ایک خزانہ ہے۔ 

مسند احمد 5473 (صحیح)

باتونی، بلااحتیاط بولنے، زبان درازی کی ممانعت

بِسْمِ ﷲِ الرَّحْمٰنِ الرَّحِيْمِ

  رسولِ اکرم ﷺ نے فرمایا:  میرے نزدیک تم میں سے سب سے زیادہ محبوب اور قیامت کے دن مجھ سے سب سے زیادہ قریب بیٹھنے والے وہ لوگ ہیں جو تم میں بہترین اخلاق والے ہیں، اور میرے نزدیک تم میں سب سے زیادہ قابل نفرت اور قیامت کے دن مجھ سے دور بیٹھنے والے وہ لوگ ہیں جو باتونی، بلااحتیاط بولنے والے، زبان دراز اور تکبر کرنے والے متفيهقون ہیں“، صحابہ کرام ؓ نے عرض کیا: ﷲ کے رسولﷺ! ہم نے ثرثارون ( باتونی ) اور متشدقون ( بلااحتیاط بولنے والے ) کو تو جان لیا لیکن کون لوگ ہیں؟ آپﷺ نے فرمایا: ”تکبر کرنے والے

مسند ترمذی 2018 (صحیح)

سات تباہ کن گناہوں سے بچو

بِسْمِ ﷲِ الرَّحْمٰنِ الرَّحِيْمِ

 رسولِ کریم ﷺ نے فرمایا: سات تباہ کن گناہوں سے بچو، پوچھا گیا: اے ﷲ کے رسولﷺ ! وہ کون سے ہیں؟ فرمایا: ’’ﷲﷻ کے ساتھ شرک، جادو، جس جان کا قتل ﷲ نے حرام ٹھہرایا ہے اسے ناحق قتل کرنا، یتیم کا مال کھانا، سود کھانا، لڑائی کے دن دشمن کو پشت دکھانا( بھاگ جانا ) اور پاک دامن، بے خبر مومن عورتوں پر الزام تراشی کرنا

صحیح مسلم 262 (صحیح)

چار چیزوں سے ﷲ کی پناہ طلب کرو

بِسْمِ ﷲِ الرَّحْمٰنِ الرَّحِيْمِ

ہمارے پیارے نبی حضرت محمد مصطفٰی ﷺ چار چیزوں سے ﷲﷻ کی پناہ طلب فرمایا کرتے تھے : ایسے علم سے جو نفع نہ دے، ایسے دل سے جو ﷲ تعالٰی سے نہ ڈرے، ایسی دُعا سے جو قبول نہ ہو اور ایسے نفس سے جو سیر نہ ہو ۔

سنن النسائی 5444 (صحیح)

صدقہ و خیرات کرنے کی ترغیب

بِسْمِ ﷲِ الرَّحْمٰنِ الرَّحِيْمِ

نبيِ رحمت ﷺ نے فرمایا: ”ابن آدم! اگر تو اپنی حاجت سے زائد مال ﷲﷻ کی راہ میں خرچ کرے گا تو یہ تیرے لیے بہتر ہوگا، اور اگر تو اسے روک رکھے گا تو یہ تیرے لیے بُرا ہوگا، اور بقدر کفاف (روزمرہ) خرچ کرنے میں تیری ملامت نہیں کی جائے گی اور صدقہ و خیرات دیتے وقت اُن لوگوں سے شروع کر جن کی کفالت تیرے ذمہ ہے، اور اُوپر والا ( دینے والا ) ہاتھ نیچے والے ہاتھ ( مانگنے والے ) سے بہتر ہے“۔

جامع الترمذی 2382 (صحیح)

موزوں پر مسح کرنے کی مدت

بِسْمِ ﷲِ الرَّحْمٰنِ الرَّحِيْمِ

نبيِ رحمت ﷺ نے مسافر کو تین دن اور مقیم کو ایک دن موزوں پر مسح کرنے کی رخصت عنایت فرمائی ہے بشرطیکہ انہوں نے وضو کے بعد (چمڑے کے) موزے پہنے ہوں ۔

مشکوٰۃ 519 (صحیح)

لڑکیوں اور بہنوں کی پرورش پر اجر

بِسْمِ اللّٰهِ الرَّحْمٰنِ الرَّحِیْمِ

  رسولِ کریم ﷺ نے فرمایا: ”جو شخص لڑکیوں کی پرورش کررہا ہو، پھر اُن کی پرورش سے آنے والی مصیبتوں پر صبر کرے تو یہ سب لڑکیاں اسکے لیے جہنم سے آڑ بنیں گی“۔

جامع الترمذی 1913 (صحیح)

خادم کی غلطیاں معاف کرنے کا بیان

بِسْمِ اللّٰهِ الرَّحْمٰنِ الرَّحِیْمِ

 رَحْمَۃً لِّلْعَالَمِیْن رسولِ کریم ﷺ کے پاس ایک آدمی نے آکر پوچھا: اللّٰه کے رسولﷺ! میں اپنے خادم کی غلطیوں کو کتنی بار معاف کروں؟ آپﷺ اُس شخص کے اِس سوال پر خاموش رہے، اُس نے پھر پوچھا: اللّٰه کے رسولﷺ! میں اپنے خادم کی غلطیوں کو کتنی بار معاف کروں؟ آپﷺ نے فرمایا: ”ہر دن 70 ( ستر ) بار معاف کرو‘‘۔ 

جامع الترمذی 1949 (صحیح)

موت کو کثرت سے یاد کیا کرو

بِسْمِ اللّٰهِ الرَّحْمٰنِ الرَّحِیْمِ

 مُحسنِ انسانیت سرورِ کائنات حضرت محمد مصطفٰیﷺ نے فرمایا: لذتوں کو توڑنے والی ( یعنی موت ) کو کثرت سے یاد کیا کرو۔

جامع الترمذی 2307 (صحیح)

سچے و امانتدار تاجر کی فضیلت

بِسْمِ اللّٰهِ الرَّحْمٰنِ الرَّحِیْمِ

 ہمارے پیارے نبی حضرت محمد مصطفٰی ﷺ نے فرمایا: سچا اور امانت دار تاجر ( قیامت کے دن ) انبیاء، صدیقین اور شہداء کے ساتھ ہو گا۔

جامع الترمذی 1209 (صحیح)

تحفہ کے متعلق بیان

بِسْمِ اللّٰهِ الرَّحْمٰنِ الرَّحِیْمِ

 نبيِ رحمت ﷺ نے فرمایا: ”جسے کوئی تحفہ دیا جائے پھر اگر اسے میسر ہو تو اس کا بدلہ دے اور جسے میسر نہ ہو تو وہ ( تحفہ دینے والے کی ) تعریف کرے، اس لیے کہ جس نے تعریف کی اس نے اس کا شکریہ ادا کیا اور جس نے نعمت کو چھپالیا اس نے کفران نعمت کیا، اور جس نے اپنے آپ کو اس چیز سے سنوارا جو وہ نہیں دیا گیا ہے، تو وہ جھوٹ کے دو کپڑے پہننے والے کی طرح ہے‘‘ ۔

جامع الترمذی 2034 (صحیح)

قرض دار کی نمازِ جنازہ کا بیان

بِسْمِ اللّٰهِ الرَّحْمٰنِ الرَّحِیْمِ

 نبی کریم ﷺ کے پاس ایک شخص لایا گیا تاکہ آپﷺ اس کی نمازِ جنازہ پڑھائیں تو آپ ﷺ نے فرمایا: ”تم اپنے ساتھی کی نماز پڑھ لو کیونکہ اِس پر قرض ہے“۔ ( میں نہیں پڑھوں گا ) اس پر حضرت ابوقتادہ ؓ نے عرض کیا: اس کی ادائیگی میرے ذمے ہے، رسولِ کریم ﷺ نے پوچھا: ”پورا پورا ادا کرو گے؟“ تو انہوں نے کہا: ( ہاں ) پورا پورا ادا کروں گا تو آپﷺ نے اس کی نمازِ جنازہ پڑھائی۔ 

جامع الترمذی 1069 (صحیح)

سورہ المک کی فضیلت

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریم ﷺ نے فرمایا: ’’قرآنِ کریم کی ایک سورت تیس آیتوں والی، اپنے پڑھنے والے کے لیے سفارش کرے گی، حتیٰ کہ اسے بخش دیا جائے گا۔‘‘ ( مراد ہے ) ( تباركَ الذِي بيدِهِ المُلكُ )۔

سنن ابوداؤد 1400 (صحیح)

ﷲ کے بارے میں ہمیشہ اچھا گمان رکھو

بِسْمِ اللّٰهِ الرَّحْمٰنِ الرَّحِیْمِ

صادق و امین رسولِ کریم‌ﷺ نے فرمایا: تم میں سے جس کسی کو بھی موت آئے تو اِس حال میں آئے کہ وہ ﷲﷻ کے بارے میں اچھا گمان رکھتا ہو، ایک قوم کو اللّٰه تعالٰی کے بارے میں اُن کے سوئےِظن نے ہلاک کردیا تھا، ارشادِ باری تعالٰی ہے: تمہاری اس بدگمانی نے جو تم نے اپنے رب سے کررکھی تھی تمہیں ہلاک کردیا اور بالآخر تم گھاٹا پانے والوں میں ہوگئے۔ (سورہ حم سجدۃ: ۲۳) ۔

مسند احمد 2980 (صحیح)

بغیر وجہ طلاق مانگنے کی سزا

بِسْمِ اللّٰهِ الرَّحْمٰنِ الرَّحِیْمِ

رسول اکرم ﷺ نے فرمایا: جو عورت بغیر کسی وجہ کے اپنے شوہر سے طلاق مانگتی ہے اس پر جنت کی خوشبو حرام ہے ۔

سنن ابوداؤد 2226 (صحیح)

نہ غیبت کرو اور نہ ہی غیبت سنو

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا: جس نے اپنے (مسلمان) بھائی کی غیر موجودگی میں اُس کی غیبت نہ ہونے دی تو ﷲﷻ پر حق ہے کہ وہ اسے جہنم کی آگ سے آزاد کردے ۔ 

مشکوٰۃ 4981 (صحیح)

اسمِ اعظم دعاؤں کی قبولیت کی ضمانت

بِسْمِ اللّٰهِ الرَّحْمٰنِ الرَّحِیْمِ

خَاتَمِ النَّبِیِّیْن رسولِ کریم ﷺ نے فرمایا: ’’ﷲﷻ کا اسمِ اعظم ان دو آیتوں میں ہے

وَإِلَهُكُمْ إِلَهٌ وَاحِدٌ لَا إِلَهَ إِلَّا هُوَ الرَّحْمَنُ الرَّحِيمُ

اور سورہ آلِ عمران کی ابتدائی آیت

 الم اللَّهُ لَا إِلَهَ إِلَّا هُوَ الْحَيُّ الْقَيُّومُ۔

سنن ابوداؤد 1496(صحیح)

مسلمان کو گالی دینا گناہ ہے

بِسْمِ اللّٰهِ الرَّحْمٰنِ الرَّحِیْمِ

صادق و امین رسولِ کریم‌ ﷺ نے فرمایا: مسلمان کو گالی دینا گناہ ہے اور اس سے جنگ کرنا کفر ہے۔

سنن ابنِ ماجہ 69 (صحیح)

نکاح کیلئے دیندار کو ترجیح دو

لبِسْمِ اللّٰهِ الرَّحْمٰنِ الرَّحِیْمِ

رسولِ کریمﷺ نے فرمایا: تمہارے پاس جب کوئی ایسا شخص( نکاح کا پیغام لےکر) آئے، جس کی دین داری اور اخلاق سے تم مطمئن ہو تو اس سے نکاح کردو۔ اگر ایسا نہیں کرو گے تو زمین میں فتنہ اور فساد برپا ہوگا۔ لوگوں نے عرض کیا: اللّٰه کے رسولﷺ ! اگر اس میں کچھ ہو؟ آپﷺ نے تین بار یہی فرمایا: ”جب تمہارے پاس کوئی ایسا شخص آئے جس کی دین داری اور اخلاق سے تم مطمئن ہو تو اس سے نکاح کر دو۔

جامع الترمذی 1085(صحیح)

جانتے ہو یا نہیں، ہر ایک کو سلام کرو

بِسْمِ اللّٰهِ الرَّحْمٰنِ الرَّحِیْمِ

ایک آدمی نے ہمارے پیارے نبی حضرت محمد مصطفٰی ﷺ سے پوچھا کون سا اسلام بہتر ہے؟ رَحْمَۃً لِّلْعَالَمِیْن ﷺ نے فرمایا کہ تو کھانا کھلائے اور ہر شخص کو سلام کرے خواہ اس کو تو جانتا ہو یا نہ جانتا ہو ۔

صحیح البخاری 28 (صحیح)

خاوند کی ناشُکری کا بیان

بِسْمِ اللّٰهِ الرَّحْمٰنِ الرَّحِیْمِ

نبيِ رحمت ﷺ نے فرمایا مجھے دوزخ دکھلائی گئی تو اس میں زیادہ تر عورتیں تھیں جو کفر کرتی ہیں۔ کہا گیا حضور ﷺ کیا وہ اللّٰه کے ساتھ کفر کرتی ہیں؟ آپﷺ نے فرمایا کہ خاوند کی ناشُکری کرتی ہیں اور احسان کی ناشُکری کرتی ہیں۔ اگر تم عمربھر ان میں سے کسی کے ساتھ احسان کرتے رہو۔ پھر تمہاری طرف سے کبھی کوئی اُن کے خیال میں ناگواری کی بات ہوجائے تو فوراً کہہ اٹھے گی کہ میں نے کبھی بھی تجھ سے کوئی بھلائی نہیں دیکھی ۔

صحیح البخاری 29

توبہ کے دروازے ہمیشہ کھلے ہیں

بِسْمِ اللّٰهِ الرَّحْمٰنِ الرَّحِیْمِ

 رسولِ اکرم ﷺ نے فرمایا: جب کسی آدمی کی سواری گم ہوجائے تو کیا وہ اسکو پالینے پر خوش ہوتا ہے؟ لوگوں نے کہا: جی ہاں اے ﷲ کے رسول! آپﷺ نے فرمایا: اُس ذات کی قسم جس کے ہاتھ میں محمد(ﷺ) کی جان ہے! ﷲﷻ کو اپنے بندے کی توبہ کی وجہ سے اس سے زیادہ خوشی ہوتی ہے، جو تم میں سے کسی کو سواری پالینے کی وجہ سے ہوتی ہے۔

 مسند احمد 10156(صحیح)

طہارت کے متعلق احکامات

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے مونچھیں کاٹنے، ناخن تراشنے، زیر ناف کے بال مونڈنے اور بغلوں کے بال اکھیڑنے کے لیے یہ مدت مقرر کی ہے کہ ہم چالیس دن سے زائد نہ گزرنے دیں۔

سنن النسائی 14 (صحیح)

طب اور جھاڑ پھونک کا بیان

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے حرام چیز کو بطورِ دوا استعمال کرنے سے بھی منع فرمایا ہے ۔ 

مشکوٰۃ 4539 (صحیح)

عقیقہ (نومولود) کے معاملات

بِسْمِ ﷲِ الرَّحْمٰنِ الرَّحِيْمِ

نبيِ رحمت ﷺ نے فرمایا: ”ہر بچہ عقیقہ کے بدلے گروی رکھا ہوا ہے، پیدائش کے ساتویں دن اس کا عقیقہ کیا جائے، اس کا نام رکھا جائے اور اس کے سر کے بال منڈائے جائیں“۔ 

جامع الترمذی 1522 (صحیح)

ﷲﷻ کا شُکر ادا کرنے کا بہترین انداز

بِسْمِ اللّٰهِ الرَّحْمٰنِ الرَّحِیْمِ

 جب ہمارے پیارے نبی حضرت محمد مصطفٰی ﷺ کو کوئی خوش کن معاملہ پیش آتا تو آپﷺ ﷲ تعالٰی کا شُکر ادا کرنے کے لیے سجدہ ریز ہوجایا کرتے تھے ۔ 

مشکوٰۃ 1494 (صحیح)

ﷲﷻ بہت رحیم و کریم ھے

بِسْمِ اللّٰهِ الرَّحْمٰنِ الرَّحِیْمِ

 ‌نبيِ رحمت ﷺ نے فرمایا: لوگوں میں سے جسکو بھی کوئی جسمانی تکلیف لاحق ہوتی ہے تو ﷲﷻ اسکی حفاظت کرنے والے فرشتوں سے کہتا ہے: میرا بندہ دن اور رات میں خیر و بھلائی کے جو کام (صحت کی حالت میں) کرتا تھا، تم وہ لکھتے جاؤ، جب تک یہ زندہ رہے۔ 

مسند احمد 2416 (صحیح)

استغفار کرنے کی فضیلت

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریم ﷺ نے فرمایا: بندہ اس وقت تک ﷲﷻ کے عذاب سے امن میں رہتا ہے، جب تک ﷲ تعالٰی سے استغفار کرتا رہتا ہے۔ 

مسند احمد 5483 (صحیح)

جھوٹی قسم کھانے پر وعید

بِسْمِ اللّٰهِ الرَّحْمٰنِ الرَّحِیْمِ

نبی کریم ﷺ نے فرمایا: جس نے ( کسی حاکم وغیرہ کی مجلس میں محبوس ہوکر یا دیدہ دانستہ ) جھوٹی قسم کھائی تو اسے چاہیے کہ اپنے چہرے کا مقام آگ میں بنالے ۔  

سنن ابوداؤد 3243 (صحیح)

اصل میں پہلوان کون ھے؟

بِسْمِ اللّٰهِ الرَّحْمٰنِ الرَّحِیْمِ

وجہِ تخلیق کائنات حضرت محمد مصطفٰی ﷺ نے فرمایا: تم لوگ زبردست پہلوان ( بہت زیادہ پچھاڑنے والا ) کسے کہتے ہو ؟ صحابہ کرام ؓ نے کہا: جسے لوگ پچھاڑ نہ سکیں  آپﷺ نے فرمایا: نہیں، پہلوان وہ ہے جو غصے کی حالت میں اپنے آپ کو قابو میں رکھے ۔ 

سنن ابوداؤد 4779(صحیح)

برکت والی تسبیحات

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا: ”کچھ چیزیں نماز کے پیچھے ( بعد میں ) پڑھنے کی ایسی ہیں کہ ان کا کہنے والا محروم و نامراد نہیں رہتا، ہر نماز کے بعد 33 بار سبحان اللہ کہے، 33 بار الحمدللہ کہے، اور 34 بار اللہ اکبر کہے“۔

جامع الترمذی 3412 (صحیح)

روزانہ دو فرشتوں کا اعلان

بِسْمِ اللّٰهِ الرَّحْمٰنِ الرَّحِیْمِ

مُحسنِ انسانیت سرورِ کائنات حضرت محمد مصطفٰیﷺ نے فرمایا کوئی دن ایسا نہیں جاتا کہ جب بندے صبح کو اٹھتے ہیں تو دو فرشتے آسمان سے نہ اترتے ہوں ۔ ایک فرشتہ تو یہ کہتا ہے کہ اے اللّٰه ! خرچ کرنے والے کو اس کا بدلہ دے ۔ اور دوسرا کہتا ہے کہ اے اللّٰه ! ممسك (کنجوس) اور بخیل کے مال کو تلف کردے ۔

صحیح البخاری 1442 (صحیح)

دینِ اسلام میں نماز کی اہمیت

بِسْمِ اللّٰهِ الرَّحْمٰنِ الرَّحِیْمِ

خَاتَمِ النَّبِیِّیْن رسولِ کریمﷺ نے ایک روز نماز کا ذکر کرتے ہوئے فرمایا: جس نے نماز کی حفاظت و پابندی کی تو وہ اُس شخص کے لیے روزِ قیامت نُور، دلیل اور نجات ہو گی، اور جس نے اسکی حفاظت و پابندی نہ کی تو روزِ قیامت اسکے لیے نور ، دلیل اور نجات نہیں ہوگی اور وہ قارون، فرعون، ہامان اور ابی بن خلف کے ساتھ ہوگا ۔

مشکوٰۃ 578 (صحیح)

کبھی بھی ﷲ کی یاد سے غافل نہ ہو

بِسْمِ اللّٰهِ الرَّحْمٰنِ الرَّحِیْمِ

نبيِ رحمت ﷺ نے فرمایا: جو شخص کہیں لیٹا ہو اور اس میں ﷲﷻ کا ذکر نہ کیا ہو تو قیامت کے دن اسے حسرت و افسوس ہوگا۔ اور جو شخص کہیں بیٹھا ہو اور وہاں ﷲ عزوجل کا ذکر نہ کیا ہو تو قیامت کے دن اسے حسرت و افسوس ہوگا۔

سنن ابوداؤد 5059 (صحیح)

حیا اور کم گوئی کی اہمیت

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا: حیا اور کم گوئی ایمان کی شاخیں ہیں، جبکہ فحش گوئی اور بیان (مبالغہ آرائی) نفاق کی دو شاخیں ہیں۔

مشکوٰۃ 4796 (صحیح)

جمائی لینے کا بیان

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا: بلاشبہ ﷲﷻ چھینک کو پسند اور جمائی کو ناپسند کرتا ہے۔ چنانچہ جب کسی کو جمائی آئے تو جہاں تک ہوسکے اسے روکے اور ہاء ہاء کی آواز نہ نکالے۔ بلاشبہ یہ شیطان کی طرف سے ہوتی ہے اور وہ اس سے ہنستا ہے۔

سنن ابوداؤد 5028 (صحیح)

نماز میں آمین کہنے کی فضیلت

بِسْمِ ﷲِ الرَّحْمٰنِ الرَّحِيْمِ

رَحْمَۃً لِّلْعَالَمِیْن رسولِ کریم ﷺ نے فرمایا: جب امام آمین کہے تو تم بھی آمین کہو، کیونکہ جس کی آمین فرشتوں کی آمین کے موافق (ساتھ ) ہوگئی اس کے سابقہ گناہ معاف کر دیے جاتے ہیں ۔

مشکوٰۃ 825

آذان کا جواب دینے کا بیان

بِسْمِ اللّٰهِ الرَّحْمٰنِ الرَّحِیْمِ

خَاتَمُ الْمُرْسَلین رسولِ کریم ﷺ نے فرمایا: جب تم آذان سنو تو اسی طرح کہو جیسے کہ مؤذن کہتا ہے ۔

سنن ابوداؤد 522 (صحیح)

مہاجر کون ھے؟

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا مسلمان وہ ہے جس کی زبان اور ہاتھ سے دوسرے مسلمان محفوظ رہیں اور مہاجر وہ ہے جو اُن کاموں کو چھوڑ دے جن سے ﷲﷻ نے منع فرمایا ہے۔ 

صحیح البخاری 10(صحیح)

صدقہ و خیرات کرنے کی ترغیب

بِسْمِ اللّٰهِ الرَّحْمٰنِ الرَّحِیْمِ

بی بی آمنہ کے لعل حضرت محمد مصطفٰی ﷺ نے فرمایا: خیرات کو مت روک ورنہ تیرا رزق بھی روک دیا جائے گا ۔

صحیح البخاری 1470 (صحیح)

دُعا کی فضیلت

بِسْمِ ﷲِ الرَّحْمٰنِ الرَّحِيْمِ

نبی اکرم صلی اللہ علیہ وسلم نے فرمایا: اللہ کے نزدیک دُعا سے زیادہ معزز و مکرم کوئی چیز  ( عبادت )  نہیں ہے

جامع ترمذی 3370

ﷲﷻ وَحْدَہٗ لَاشَرِیْک ھے

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا:  یوں مت کہو : جو ﷲ چاہے اور فلاں چاہے، بلکہ یوں کہو : جو ﷲ چاہے پھر فلاں چاہے۔

سنن ابوداؤد 4980 (صحیح)

بیوی کو شوہر کے خلاف بھڑکانے کی مذمت

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریم ﷺ نے فرمایا: جو کوئی کسی کی بیوی کو اسکے شوہر کے خلاف یا غلام ( خادم ) کو اسکے مالک کے خلاف بھڑکائے، وہ ہم میں سے نہیں ۔

سنن ابوداؤد 5170(صحیح)

نمازِ جمعہ ادا کرنے کا اجر

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا: جو شخص وضو کرے اور اچھی طرح وضو کرکے جمعہ کے لیے آئے اور خاموشی سے غور کے ساتھ خطبہ سنے تو اسکے اس اور دوسرے جمعہ کے درمیان والے اور مزید تین دن کے گناہ بخش دیے جاتے ہیں ۔ اور جو کنکریوں سے کھیلتا رہے تو اس نے لغو کام کیا ۔

مشکوٰۃ 1383 (صحیح)

فوت شدگان کو بُرا نہ کہو

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا جو لوگ مرگئے ان کو بُرا نہ کہو کیونکہ جو کچھ انہوں نے آگے بھیجا تھا اسکے پاس وہ خود پہنچ چکے ہیں، انہوں نے بُرے بّھلے جو بھی عمل کئے تھے ویسا بدلہ پا لیا۔

مشکوٰۃ 6516 (صحیح)

فضول بولنے کی ممانعت

بِسْمِ اللّٰهِ الرَّحْمٰنِ الرَّحِیْمِ

 صادق و امین رسولِ کریم‌ﷺ نے فرمایا: جو خاموش رہا، وہ نجات پاگیا۔

مسند احمد 9871 (صحیح)

ﷲﷻ بہت فضل و کرم کرنے والا ہے

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریمﷺ نے فرمایا: جس نے دنیا میں کوئی گناہ کیا اور پھر اسے یہیں اُسکی سزا دی گئی تو ﷲﷻ اِس سے زیادہ انصاف والا ہے کہ وہ اِیسے بندے کو دوبارہ سزا دے، اور جس نے دنیا میں کوئی گناہ کیا اور اللہ تعالٰی نے اسکی پردہ پوشی کی اور اسکو معاف کردیا تو وہ اس سے زیادہ فضل و کرم والا ہے کہ وہ اس گناہ پر گرفت کرے، جس کو وہ معاف کر چکا ہو۔

مسند احمد 6633 (صحیح)

ظاہری و باطنی عیب تلاش مت کرو

بِسْمِ اللّٰهِ الرَّحْمٰنِ الرَّحِیْمِ

 خَاتَمُ الْمُرْسَلین رسولِ کریم ﷺ نے فرمایا: ایک دوسرے سے حسد نہ کرو، ایک دوسرے سے بغض نہ رکھو، دوسروں کے ظاہری عیب تلاش نہ کرو، دوسروں کے باطنی عیب مت ڈھونڈو، ایک دوسرے کے لیے دھوکے سے قیمتیں نہ بڑھاؤ ، اور اللہ کے ایسے بندے بن جاؤ جو آپس میں بھائی بھائی ہیں ۔

صحیح مسلم 6538 (صحیح)

گھروں میں نماز پڑھنے کا بیان

بِسْمِ اللّٰهِ الرَّحْمٰنِ الرَّحِیْمِ

حضرت ابن عمر ؓ سے روایت ہے کہ انہوں نے ایک رات جب سردی تھی اور ٹھنڈی ہوا چل رہی تھی، اذان کہی، پھر فرمایا سن لو ! اپنے گھروں میں نماز پڑھو ، پھر فرمایا کہ رسول اللہ ﷺ سرد اور برسات والی رات مؤذن کو حکم فرمایا کرتے تھے کہ وہ کہے: اپنے گھروں میں نماز پڑھو۔ 

مشکوٰۃ 1055(متفق علیہ)

آنے والے زمانوں کا بیان

بِسْمِ اللّٰهِ الرَّحْمٰنِ الرَّحِیْمِ

رسولِ کریم ﷺ نے فرمایا: میری امت کا سب سے بہترین زمانہ میرا زمانہ ہے، پھر ان لوگوں کا جو ان کے بعد آئیں گے، پھر وہ جو ان کے بعد آئیں گے، پھر ان کے بعد ایسے لوگ آئیں گے جو گواہی طلب کیے بغیر گواہی دیں گے، وہ خیانت کریں گے، اور ان پر اعتماد نہیں کیا جائے گا، وہ نذر مانیں گے لیکن پوری نہیں کریں گے، اور ان میں موٹاپا عام ہو جائے گا ۔

مشکوٰۃ 6010 (متفق علیہ)

نظرِ بد اور اسکا علاج

بِسْمِ ﷲِ الرَّحْمٰنِ الرَّحِيْمِ

مُحسنِ انسانیت سرورِ کائنات حضرت محمد مصطفٰیﷺ "جِنوں اور اِنسان کی نظرِ بد سے پناہ مانگا کرتے تھے، یہاں تک کہ معوذتین ( سورۃ الفلق اور سورۃ الناس ) نازل ہوئیں، جب یہ سورتیں اترگئیں تو آپﷺ نے اِن دونوں کو لے لیا اور اِن کے علاوہ کو چھوڑ دیا

جامع الترمذی 2058

قرض کی ادائیگی میں مہلت دینے کا اجر

بِسْمِ اللّٰهِ الرَّحْمٰنِ الرَّحِیْمِ

امام المرسلین حضرت محمد مصطفٰی ﷺ نے فرمایا : جو شخص پسند کرتا ہے کہ ﷲﷻ اسے اپنے سائے میں جگہ دے تو اسے چاہیے کہ تنگ دست کو مہلت دے یا اس کا قرض معاف کر دے ۔ 

سنن ابنِ ماجہ 2419 (صحیح)

بائیں ہاتھ سے کھانے، پینے کی ممانعت

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا: ”جب تم میں سے کوئی کھائے تو دائیں ہاتھ سے کھائے اور دائیں ہاتھ سے پیئے، اس لیے کہ شیطان اپنے بائیں ہاتھ سے کھاتا ہے اور بائیں ہاتھ سے پیتا ہے“۔ 

جامع الترمذی 1800 (صحیح)

مریض کی عیادت کا ثواب

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریم ﷺ نے فرمایا: جب مسلمان اپنے مسلمان بھائی کی عیادت کرتا ہے تو وہ واپس آنے تک جنت کے میوے کھانے میں مصروف رہتا ہے ۔

مشکوٰۃ 1527(صحیح)

نوافل و سنتوں کے احکامات

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریم ﷺ سے پوچھا گیا : کون سا عمل افضل ہے؟ آپﷺ نے فرمایا: ( نماز میں ) لمبا قیام۔  

سنن ابوداؤد 1325 (صحیح)

بخار کو بُرا مت کہو

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ کے پاس بخار کا ذِکر کیا گیا تو کسی آدمی نے اسے بُرا بھلا کہا، تو نبی کریم ﷺ نے فرمایا: اسے بُرا بھلا نہ کہو، کیونکہ وہ گناہوں کو ایسے صاف کردیتا ہے جیسے آگ لوہے کی میل کچیل دور کر دیتی ہے۔

مشکوٰۃ 1583 (صحیح)

تین دن سے زیادہ ترک تعلق کی ممانعت

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا: کسی مسلمان کے لیے جائز نہیں کہ اپنے بھائی کے ساتھ تین دن سے زیادہ میل جول چھوڑے رہے کہ جب دونوں کی ملاقات ہو تو یہ بھی منہ پھیر لے اور وہ بھی ۔ اور ان میں سب سے بہتر وہ ہے جو السلام علیکم کہنے میں ابتدا کرے ۔

سنن ابوداؤد 4911(صحیح)

ہر لمحہ شیطان سے بچنے کا بیان

بِسْمِ اللّٰهِ الرَّحْمٰنِ الرَّحِیْمِ

صادق و امین رسولِ کریم‌ﷺ نے فرمایا: بلاشبہ شیطان ابنِ آدم کے جسم میں اس طرح گردش کرتا ہے جیسے خون۔  

سنن ابوداؤد 4719 (صحیح)

نیکی کرنے کے مواقع تلاش کرو

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا: ”تم لوگوں میں سے کوئی شخص کسی بھی نیک کام کو حقیر نہ سمجھے، اگر کوئی نیک کام نہ مل سکے تو اپنے بھائی سے مسکرا کر ملے، اور اگر تم گوشت خریدو یا ہانڈی پکاؤ تو شوربا ( سالن ) بڑھالو اور اس میں سے چلو بھر اپنے پڑوسی کو دے دو“۔

جامع الترمذی 1833(صحیح)

ٹرٹر زبان چلانے کی ممانعت

بِسْمِ اللّٰهِ الرَّحْمٰنِ الرَّحِیْمِ

خَاتَمُ الْمُرْسَلین رسولِ کریم ﷺ نے فرمایا:  تحقیق ﷲﷻ ایسے آدمی سے غصے ہوتا ہے جو ( ناحق ) زبان آور ہو ( بہت باتیں بنائے ) اپنی زبان کو ایسے چلائے جیسے گائے چلاتی ہے۔( اور لپیٹ لپیٹ کر گھاس کھاتی ہے ۔ )  

سنن ابوداؤد 5005

آداب و اخلاق کا بیان

بِسْمِ اللّٰهِ الرَّحْمٰنِ الرَّحِیْمِ

صادق و امین رسولِ کریم‌ﷺ نے فرمایا: نیک چلن، عمدہ کردار اور میانہ روی نبوت کا پچیسواں حصہ ہے ۔

سنن ابوداؤد 4776(صحیح)

دوغلے پن کا عذاب

بِسْمِ اللّٰهِ الرَّحْمٰنِ الرَّحِیْمِ

مُحسنِ انسانیت سرورِ کائنات حضرت محمد مصطفٰی ﷺ نے فرمایا : جس کے دنیا میں دو منہ ہوئے ( جو آدمی دو رخا ہوا ) قیامت کے روز اسکی دو زبانیں ہوں گی جو آگ کی ہوں گے۔  

سنن ابوداؤد 4873 (صحیح)

دوست بنانے میں احتیاط کا تقاضا

بِسْمِ اللّٰهِ الرَّحْمٰنِ الرَّحِیْمِ

وجہِ تخلیق کائنات حضرت محمد مصطفٰی ﷺ نے فرمایا: انسان اپنے محبوب ساتھی کے دین پر ہوتا ہے ۔ تو تمہیں چاہیے کہ غور کرو کس سے دوستی کر رہے ہو ۔  

سنن ابوداؤد 4833 (صحیح)

سات مہلک گناہوں سے اجتناب کرو

بِسْمِ اللّٰهِ الرَّحْمٰنِ الرَّحِیْمِ

رسولِ کریم ﷺ نے فرمایا: ’’سات مہلک چیزوں سے اجتناب کرو۔‘‘ انہوں نے عرض کیا، ﷲ کے رسولﷺ! وہ کیا ہیں ؟ آپ ﷺ نے فرمایا: ’’ ﷲﷻ کے ساتھ شرک کرنا، جادو کرنا، جس کے قتل کرنے کو ﷲ نے حرام قرار دیا ہے اسے ناحق قتل کرنا، سود کھانا، یتیم کا مال کھانا، معرکہ کے دن میدان جہاد سے پیٹھ پھیر کر فرار ہونا اور پاک دامن عورتوں پر تہمت لگانا۔

مشکوٰۃ 52 (متفق علیہ)

نمازِ عشاء و فجر باجماعت کی فضیلت

بِسْمِ اللّٰهِ الرَّحْمٰنِ الرَّحِیْمِ

خیرُالبشر رسولِ کریم ﷺ نے فرمایا: جس نے عشاء کی نماز باجماعت ادا کی، پس وہ اس شخص کی طرح ہے جس نے آدھی رات قیام کیا اور جس نے صبح کی نماز بھی باجماعت پڑھی، وہ اس شخص کی طرح ہے، جس نے ساری رات قیام کیا۔ 

مسند احمد 2452 (صحیح)

علم کے ختم ہونے کا بیان

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰیﷺ نے فرمایا:  اللہ تعالٰی علم اس طرح نہیں اٹھائے گا کہ اسے لوگوں کے سینوں سے کھینچ لے، لیکن وہ علم کو علماء کی وفات کے ذریعہ سے اٹھائے گا، یہاں تک کہ جب وہ کسی عالم کو باقی نہیں رکھےگا تو لوگ اپنا سردار جاہلوں کو بنا لیں گے، ان سے مسئلے پوچھے جائیں گے تو وہ بغیر علم کے فتوے دیں گے، وہ خود گمراہ ہوں گے اور دوسروں کو بھی گمراہ کریں گے

جامع الترمذی 2652 (صحیح)

وصیت کے احکام

بِسْمِ اللّٰهِ الرَّحْمٰنِ الرَّحِیْمِ

محبوب رب العالمین حضرت محمد مصطفٰی ﷺ نے فرمایا: کسی مسلمان کو یہ اس بات کا حق نہیں کہ وہ دو راتیں ایسی حالت میں گزارے کہ وہ کوئی وصیت کرنا چاہتا ہو اور اس کے پاس وصیت تحریری شکل میں موجود نہ ہو

جامع الترمذی 2118 (صحیح)

زکوٰۃ ادا نہ کرنے کی سزا

بِسْمِ ﷲِ الرَّحْمٰنِ الرَّحِيْمِ

نبيِ رحمت ﷺ نے فرمایا: جو شخص اپنے مال ( سونا، چاندی اور رقم ) کی زکاۃ ادا نہیں کرتا، قیامت کے دن اس کے مال کو اس کے سامنے گنجے سانپ کی صورت میں لایا جائے گا جس کی آنکھوں پر دو سیاہ نقطے ہوں گے۔ وہ اسے چمٹ جائے گا یا اس کے گلے کا طوق بن جائے گا اور کہے گا: میں تیرا خزانہ ہوں ۔ میں تیرا خزانہ ہوں ۔

سنن نسائی 2483

وضو کرتے وقت بسم اللہ کی اہمیت

بِسْمِ اللّٰهِ الرَّحْمٰنِ الرَّحِیْمِ

صادق و امین رسولِ کریم‌ﷺ نے فرمایا:  جس کا وضو نہیں اسکی نماز نہیں اور جو شخص وضو کے شروع میں اللہ کا نام نہ لے ( بسم الله نہ پڑھے ) اس کا وضو نہیں ۔

سنن ابوداؤد 101(صحیح)

مسواک کی اہمیت

بِسْمِ اللّٰهِ الرَّحْمٰنِ الرَّحِیْمِ

خَاتَمُ الْمُرْسَلین رسولِ کریم ﷺ نے فرمایا: اگر میری امت پر شاق (مشکل) نہ ہوتا تو میں ان پر مسواک کرنا واجب قرار دیتا۔

مشکوٰۃ 7240 (صحیح)

فتویٰ دینے میں احتیاط برتنے کا حکم

بِسْمِ اللّٰهِ الرَّحْمٰنِ الرَّحِیْمِ

محبوب رب العالمین حضرت محمد مصطفٰیﷺ نے فرمایا : جسے کسی مفتی نے علم کے بغیر فتویٰ دیا تو عمل کرنے والے کا گناہ فتویٰ دینے والے پر ہو گا ۔‘‘ مزید یہ کہ جس نے اپنے بھائی کو کوئی ایسا مشورہ دیا جبکہ اسے علم تھا کہ بھلائی اس کے خلاف میں ہے تو اس نے خیانت کی ۔

سنن ابوداؤد 3657 (صحیح)

صحت و فراغت کا بیان

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا: دو نعمتیں ایسی ہیں کہ اکثر لوگ ان کی قدر نہیں کرتے، صحت اور فراغت۔

مشکوٰۃ 6412 (صحیح)

اچھی طرح وضو کرنے کی برکات

بِسْمِ اللّٰهِ الرَّحْمٰنِ الرَّحِیْمِ

مخبر صادق حضرت محمد مصطفٰیﷺ نے فرمایا: جس نے وضو کیا اور خوب اچھی طرح وضو کیا، تو اسکے جسم سے اس کے گناہ خارج ہوجاتے ہیں حتٰی کہ اس کے ناخنوں کے نیچے سے بھی نکل جاتے ہیں ۔

صحیح مسلم 578 (صحیح)

سرگوشی کے آداب

بِسْمِ اللّٰهِ الرَّحْمٰنِ الرَّحِیْمِ

اِمامُ المرسلین حضرت محمد مصطفٰی ﷺ نے فرمایا: ”جب تم تین آدمی ایک ساتھ ہو، تو دو آدمی اپنے تیسرے ساتھی کو اکیلا چھوڑ کر باہم کانا پھوسی نہ کریں یعنی تیسرے شخص کو چھوڑ کر دو سرگوشی نہ کریں کیونکہ اس سے اسے(تیسرے کو) دکھ اور رنج ہوگا۔

جامع الترمذی 2825 (صحیح)

صالح اعمال کی توفیق

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریمﷺ نے فرمایا: ’’بیشک ﷲﷻ جب کسی بندے کے ساتھ بھلائی کا ارادہ کرتا ہے تو وہ اسے (اطاعت والے) کاموں پر لگا دیتا ہے ۔‘‘ عرض کیا گیا: ﷲ کے رسولﷺ ! وہ اسے کس طرح کام پر لگاتا ہے ؟ فرمایا:’’ موت سے پہلے اسے صالح عمل کرنے کی توفیق عطا فرما دیتا ہے ۔

مشکوٰۃ 5288 (صحیح)

دُعا مانگنے کے آداب

بِسْمِ اللّٰهِ الرَّحْمٰنِ الرَّحِیْمِ

نبيِ رحمت ﷺ نے ایک شخص کو نماز کے اندر دُعا کرتے ہوئے سنا، اس نے نبی اکرمﷺ پر صلاۃ ( درود )  نہ بھیجا، نبی کریمﷺ نے فرمایا: ”اس نے جلدی کی“، پھر آپﷺ نے اسے بلایا، اور اس سے اور اسکے علاوہ دوسروں کو خطاب کرکے فرمایا: ”جب تم میں سے کوئی بھی نماز پڑھ چکے تو اسے چاہیئے کہ وہ پہلے ﷲﷻ کی حمد و ثنا بیان کرے، پھر نبیﷺ پر صلاۃ ( درود )  بھیجے، پھر اسکے بعد وہ جو چاہے دُعا مانگے“۔ 

جامع الترمذی 3477 (صحیح)

عشقِ نبیﷺ ایمان کی پہلی شرط ھے

بِسْمِ اللّٰهِ الرَّحْمٰنِ الرَّحِیْمِ

ہم نبی کریمﷺ کے ساتھ تھے اور آپ عمر بن خطاب ؓ کا ہاتھ پکڑے ہوئے تھے۔ حضرت عمر ؓ نے عرض کیا: یارسول اللہﷺ ! آپ مجھے ہر چیز سے زیادہ عزیز ہیں، سوا میری اپنی جان کے۔ نبی کریمﷺ نے فرمایا کہ نہیں، اس ذات کی قسم جس کے ہاتھ میں میری جان ہے( ایمان اس وقت تک مکمل نہیں ہو سکتا) جب تک میں تمہیں تمہاری اپنی جان سے بھی زیادہ عزیز نہ ہوجاؤں۔ حضرت عمر ؓ نے عرض کیا: پھر واللہ! اب آپﷺ مجھے میری اپنی جان سے بھی زیادہ عزیز ہیں۔ نبی کریم ﷺ نے فرمایا کہ ہاں، عمر ؓ! اب تیرا ایمان پورا ہوا۔

صحیح البخاری 6632 (صحیح)

(فِدَاکَ اَبِیْ وَ اُمِّیْ وَ رُوْحِیْ وَ نَفسِی وَ قَلْبِیْ یَا سَیِّدِیْ یَا رَسُوْلَ اللّٰهﷺ)

نمازی کی فضیلت

بِسْمِ اللّٰهِ الرَّحْمٰنِ الرَّحِیْمِ

خَاتَمُ الْمُرْسَلین رسولِ کریم ﷺ نے فرمایا: بے شک میری امت کے لوگوں کو قیامت کے دن بلایا جائے گا، تو وضو کے نشانات کی وجہ سے ان کے ہاتھ پاؤں اور پیشانی چمکتی ہوگی، پس تم میں سے جو شخص اپنی چمک کو بڑھانا چاہے تو وہ بڑھا لے ۔

مشکوٰۃ 290 (متفق علیہ)

تلاوتِ قرآن پاک کے آداب

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریم ﷺ نے فرمایا: بلند آواز سے قرآن کی تلاوت کرنے والا اعلانیہ صدقہ کرنے والے کی طرح ہے اور پوشیدہ آواز میں تلاوت کرنے والا مخفی انداز میں صدقہ کرنے والے کی طرح ہے۔ 

مسند احمد 8360 (صحیح)

قسم میں انشاللہ کہنے کا حکم

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا : جس نے قسم کھائی اور اِن شاءاللہ کہا تو چاہے وہ ( اپنے ارادے سے ) رجوع کرلے، چاہے ( ارادہ قائم ) رہنے دے ( اور وہ کام کرلے جس کی قسم کھائی ہے ) وہ قسم توڑنے والا ( شمار ) نہیں ہوگا ۔

سنن ابنِ ماجہ 2105 (صحیح)

جنازے کے لیے جلدی کرنے کا بیان

بِسْمِ اللّٰهِ الرَّحْمٰنِ الرَّحِیْمِ

صادق و امین رسولِ کریم‌ﷺ نے فرمایا: جب میت کو چارپائی پر رکھا جاتا ہے اور لوگ اسے اپنے کندھوں پر اٹھا لیتے ہیں تو اگر وہ نیک ہو تو کہتا ہے: مجھے جلدی لے چلو، مجھے جلدی لے چلو۔ اور اگر وہ نیک نہیں تو کہتا ہے: ہائے افسوس ! مجھے کہاں لے جارہے ہو ؟ اس کی آواز کو انسان کے علاوہ ہر چیز سنتی ہے اگر انسان سن لے تو بے ہوش ہوجائے ۔ 

سنن النسائی 1910 (صحیح)

قطع تعلقی اور عیب جوئی کی ممانعت

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا:  بدگمانی سے بچو، کیونکہ بدگمانی سب سے بڑا جھوٹ ہے، تم کسی کے عیب مت تلاش کرو اور نہ جاسوسی کرو، قیمت بڑھانے کے لیے بولی مت دو اور نہ باہم حسد کرو، بغض مت رکھو اور نہ قطع تعلقی کرو اور اللّٰه کے بندو ! بھائی بھائی بن جاؤ ۔

مشکوٰۃ 5028 (متفق علیہ)

نبی کریمﷺ پر درود پڑھنے کی فضیلت

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریم ﷺ نے فرمایا : جو شخص مجھ پر ایک دفعہ درود پڑھے گا، ﷲﷻ اس پر دس رحمتیں نازل فرمائے گا اور اس کی دس غلطیاں معاف کردی جائیں گی اور اسکے دس درجے بلند کیے جائیں گے ۔

سنن النسائی 1298(صحیح)

باعثِ حسرت وندامت محافل

بِسْمِ اللّٰهِ الرَّحْمٰنِ الرَّحِیْمِ

خیرُالبشر رسولِ کریم ﷺ نے فرمایا: لوگ کسی مجلس میں بیٹھیں اور ﷲﷻ کی یاد نہ کریں، اور نہ اپنے نبی کریمﷺ پر ( درُود ) بھیجیں تو یہ چیز اُن کے لیے حسرت و ندامت کا باعث بن سکتی ہے۔ ﷲ چاہے تو انہیں عذاب دے، اور چاہے تو انہیں بخش دے

جامع الترمذی 3380(صحیح)

درُود شریف دُعا کی قبولیت کی کنجی ہے

بِسْمِ اللّٰهِ الرَّحْمٰنِ الرَّحِیْمِ

دُعا آسمان اور زمین کے درمیان رکی رہتی ہے، اس میں سے ذرا سی بھی اُوپر نہیں جاتی جب تک کہ تم اپنے نبی کریمﷺ پر صلاۃ ( درود ) نہیں بھیج لیتے۔ 

جامع الترمذی 486 (صحیح)

ﷲ کی نعمتوں کو استعمال کرو

بِسْمِ اللّٰهِ الرَّحْمٰنِ الرَّحِیْمِ

بی بی آمنہ کے لعل حضرت محمد مصطفٰی ﷺ نے فرمایا:  ﷲﷻ اپنے بندے پر اپنی نعمت کا اثر دیکھنا پسند کرتا ہے

جامع الترمذی 2819 (صحیح)

حق مہر زیادہ مقرر کرنے کی ممانعت

بِسْمِ اللّٰهِ الرَّحْمٰنِ الرَّحِیْمِ

حضرت عمر بن خطاب ؓ بیان کرتے ہیں، سن لو ! عورتوں کا حق مہر زیادہ مقرر نہ کرو ، کیونکہ وہ دنیا میں قابل عزت اور اللّٰه کے ہاں باعث تقوی ہوتا تو تمہاری نسبت اللّٰه کے نبی ﷺ اس کے زیادہ حق دار تھے ، میں نہیں جانتا کہ رسولِ کریم ﷺ نے ازواج مطہرات ؓ سے نکاح کیا ہو یا اپنی بیٹیوں کا نکاح کیا ہو تو آپ ﷺ نے بارہ اوقیہ (480 درہم) سے زیادہ حق مہر مقرر کیا ہو ۔

مشکوٰۃ 3204 (صحیح)

آسانیاں پیدا کرو نفرتیں نہ پھلاؤ

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ اپنے صحابہ کرام ؓ کو جب اپنے کسی کام کے لیے بھیجا کرتے تھے تو انہیں فرماتے: خوشخبری دینے والے بننا نفرت نہ دلانا، آسانی کرنا اور تنگی اور مشقت نہ ڈالنا ۔

سنن ابوداؤد 4835 (صحیح)

بیوہ و مساکین کی مدد پر اجر عظیم

بِسْمِ اللّٰهِ الرَّحْمٰنِ الرَّحِیْمِ

مخبر اعظم حضرت محمد مصطفٰی ﷺ نے فرمایا: ’’بیوہ اور مسکین ( کی ضروریات پوری کرنے ) کے لیے دوڑ دھوپ کرنے والا ، ﷲﷻ کی راہ میں جہاد کرنے والے کی طرح ہے، اور اس شخص کی طرح ہے جو رات کو قیام کرتا اور دن کو روزہ رکھتا ہے ۔‘‘ 

سنن ابنِ ماجہ 2140(صحیح)

معاملات میں نرمی کرنے کا بیان

بِسْمِ اللّٰهِ الرَّحْمٰنِ الرَّحِیْمِ

مُخبرِ صادق حضرت محمد مصطفٰیﷺ نے فرمایا :  ﷲﷻ نرمی کرنے والا ہے، نرمی کو پسند کرتا ہے، اور نرمی پر وہ کچھ عطا فرماتا ہے جو سختی پر عطا نہیں فرماتا۔ 

سنن ابنِ ماجہ 3688 (صحیح)

اچھی بات کہو یا خاموش رہو

بِسْمِ اللّٰهِ الرَّحْمٰنِ الرَّحِیْمِ

صادق و امین رسولِ کریم‌ ﷺ نے فرمایا : جو شخص ﷲﷻ پر اور آخرت پر ایمان رکھتا ہے تو اسے چاہیے کہ اپنے پڑوسی سے اچھا سلوک کرے۔ جو شخص ﷲ پر اور آخرت پر ایمان رکھتا ہے تو اسے چاہیے کہ اپنے مہمان کی عزت کرے۔ جو شخص ﷲ پر اور آخرت پر ایمان رکھتا ہے تو اسے چاہیے کہ اچھی بات کہے یا خاموش رہے۔

سنن ابنِ ماجہ 3672 (صحیح)

دُعا کی قبولیت کا بیان

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰیﷺ نے فرمایا : تم میں سے ہر ایک کی دُعا قبول ہوتی رہتی ہے جب تک کہ وہ جلد بازی نہ کرے۔’’ عرض کیا گیا : اے اللہ کے رسولﷺ ! وہ جلد بازی کس طرح کرتا ہے؟ آپ ﷺ نے فرمایا :’’ وہ کہتا ہے : میں نے ﷲﷻ سے دُعا کی لیکن اللہ نے میری دعا قبول نہیں کی۔

سنن ابنِ ماجہ 3853 (صحیح)

زمین پر بہترین لوگ کون ہیں ؟

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریم ﷺ نے فرمایا:  کیا میں تمہیں تمہارے بہترین افراد کی نشان دہی نہ کروں ؟’’ صحابہ کرام ؓ نے عرض کیا : کیوں نہیں ﷲ کے رسول! آپ ﷺ نے فرمایا: ’’تمہارے بہترین افراد وہ ہیں جن کو دیکھ کر ﷲﷻ کی یاد آئے ۔

سنن ابنِ ماجہ 4119 (صحیح)

توبہ واستغفار کی فضیلت

بِسْمِ اللّٰهِ الرَّحْمٰنِ الرَّحِیْمِ

نبيِ رحمت ﷺ نے فرمایا:  ﷲﷻ کہتا ہے: اے آدم کے بیٹے! جب تک تو مجھ سے دعائیں کرتا رہے گا اور مجھ سے اپنی امیدیں اور توقعات وابستہ رکھے گا میں تجھے بخشتا رہوں گا، چاہے تیرے گناہ کسی بھی درجے پر پہنچے ہوئے ہوں، مجھے کسی بات کی پرواہ و ڈر نہیں ہے، اے آدم کے بیٹے! اگر تیرے گناہ آسمان کو چھونے لگیں پھر تو مجھ سے مغفرت طلب کرنے لگے تو میں تجھے بخش دوں گا اور مجھے کسی بات کی پرواہ نہ ہو گی۔ اے آدم کے بیٹے! اگر تو زمین برابر بھی گناہ کر بیٹھے اور پھر مجھ سے  ( مغفرت طلب کرنے کے لیے ) ملے لیکن میرے ساتھ کسی طرح کا شرک نہ کیا ہو تو میں تیرے پاس اس کے برابر مغفرت لے کر آؤں گا  ( اور تجھے بخش دوں گا ) 

جامع الترمذی 3540 (صحیح)

سفید کپڑوں کی اہمیت

بِسْمِ اللّٰهِ الرَّحْمٰنِ الرَّحِیْمِ

خیرُالبشر رسولِ کریم ﷺ نے فرمایا: سفید کپڑے پہنا کرو۔ زندہ لوگ بھی اسے پہنیں اور فوت شدگان کو بھی انہی میں کفن دو۔ یہ بہترین کپڑے ہیں ۔

سنن النسائی 5325(صحیح)

دُنیا کی حقیقت

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد  مصطفٰی ﷺ نے فرمایا: دُنیا مومن کے لیے قید خانہ جبکہ کافر کے لیے جنت ہے ۔

مشکوٰۃ 5158 (صحیح)

محافل و مجالس میں ﷲ کے ذِکر کی تلقین

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریم ﷺ نے فرمایا: جو لوگ کسی مجلس سے اٹھیں اور انہوں نے اس میں ﷲﷻ کا ذکر نہ کیا ہو، تو وہ ایسے ہیں گویا کسی مردار گدھے پر سے اٹھے ہوں اور ( آخرت میں ) یہ مجلس اُن کے لیے حسرت کا باعث ہوگی۔‘‘ ( تمنا کریں گے کہ کاش ہم نے اس میں ﷲ کا ذکر کرلیا ہوتا)

سنن ابوداؤد 4855 (صحیح)

ملازم کے ساتھ حسنِ اخلاق کی ترغیب

بِسْمِ اللّٰهِ الرَّحْمٰنِ الرَّحِیْمِ

حضرت انس ؓ بیان کرتے ہیں، میں نے دس سال نبی کریم ﷺ کی خدمت کی، لیکن آپﷺ نے مجھے کبھی اُف تک نہ کہا، اور نہ ہی یہ کہا کہ تونے یہ کام کیوں کیا اور وہ کام کیوں نہیں کیا۔

مشکوٰۃ 5801 (متفق علیہ)

خوابِ غفلت سے بیدار ہونے کی تلقین

بِسْمِ اللّٰهِ الرَّحْمٰنِ الرَّحِیْمِ

خیرُالبشر رسولِ کریمﷺ نے فرمایا: میں نے جہنم کی مثل کوئی چیز نہیں دیکھی کہ جس سے بھاگنے والا خواب غفلت میں ہو، اور نہ ہی جنت کی نعمتوں و سرور کے مثل کوئی چیز دیکھی ہے جس کا چاہنے والا خواب غفلت میں ہو ۔

مشکوٰۃ 5346 (صحیح)

اطاعتِ الہٰی کی فضیلت

بِسْمِ اللّٰهِ الرَّحْمٰنِ الرَّحِیْمِ

امامِ المرسلین حضرت محمد مصطفٰیﷺ نے فرمایا: بیشک ﷲﷻ فرماتا ہے: انسان ! میری عبادت کے لیے فارغ ہوجا، میں تیرے دل کو مال داری (قناعت) سے بھر دوں گا، تیری محتاجی ختم کردوں گا اور اگر تو (ایسے) نہیں کرے گا تو میں تمہیں (دنیاوی) کاموں میں مصروف کردوں گا اور تیری محتاجی ختم نہیں کروں گا ۔

مشکوٰۃ 5172 (صحیح)

بعض فقراء کی فضیلت

بِسْمِ اللّٰهِ الرَّحْمٰنِ الرَّحِیْمِ

خیرُالبشر رسولِ کریمﷺ نے فرمایا: ’’ بہت سے پراگندہ بالوں والے (فقراء) جنہیں دروازوں سے دھکیلا جاتا ہے اگر وہ ﷲ پر قسم اٹھالے تو ﷲﷻ اسے پوری فرما دیتا ہے ۔‘‘

مشکوٰۃ 5231 (صحیح)

جوتا پہنے کا سنت طریقہ

بِسْمِ اللّٰهِ الرَّحْمٰنِ الرَّحِیْمِ

صادق و امین رسولِ کریم‌ﷺ نے فرمایا:  جب تم میں سے کوئی جوتے پہنے تو وہ دائیں سے شروع کرے اور جب اتارے تو پہلے بایاں اتارے تاکہ دایاں پاؤں پہننے میں پہلے ہو اور اتارنے میں آخر پر ہو ۔

مشکوٰۃ 4410( متفق علیہ)

دو لوگوں میں صلح کروانے کی اہمیت

بِسْمِ اللّٰهِ الرَّحْمٰنِ الرَّحِیْمِ

مُحسنِ انسانیت سرورِ کائنات حضرت محمد مصطفٰیﷺ کو یہ فرماتے سنا کہ جھوٹا وہ نہیں ہے جو لوگوں میں باہم صلح کرانے کی کوشش کرے اور اس کے لیے کسی اچھی بات کی چغلی کھائے یا اسی سلسلہ کی اور کوئی اچھی بات کہہ دے۔ 

صحیح البخاری 2692 (صحیح)

جنت کی طلب اور جہنم سے نجات کی دُعا

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰیﷺ نےفرمایا: جو شخص ﷲﷻ سے تین مرتبہ جنت کا سوال کرے (اَللّٰھُمَّ اِنِیْ اَسْئَلُکَ الْجَنَّۃَ الْفِرْدُوْسَ) تو جنت کہتی ہے : اے اللہ اسے جنت میں داخل فرما : اور جو شخص تین دفعہ آگ سے پناہ مانگے (اللَّھُمَّ اَجِرنِی مِنَ النَّار) تو آگ خود کہتی ہے : یااللہ ! اس کو آگ سے بچا ۔

سنن النسائی 5523 (صحیح)

تم آخرت کے طلبگار بنو

بِسْمِ اللّٰهِ الرَّحْمٰنِ الرَّحِیْمِ

دنیا گزر رہی ہے جبکہ آخرت آرہی ہے، اور دونوں میں سے ہر ایک کے طلبگار ہیں، تم آخرت کے طلبگار بنو اور دنیا کے طلبگار نہ بنو کیونکہ آج عمل (کا وقت) ہے اور حساب نہیں جبکہ کل حساب ہوگا اور عمل نہیں ہوگا ۔

مشکوٰۃ 5215 (صحیح)

ریاکاری سے بچنے کی تلقین

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریمﷺ نے فرمایا:  بیشک ﷲﷻ ایسے مالدار کو پسند فرماتا ہے جو پرہیزگار ہو اور گمنام ہو ۔

مشکوٰۃ 5284

میرا مال، میرا مال

بِسْمِ اللّٰهِ الرَّحْمٰنِ الرَّحِیْمِ

خَاتَمُ الْمُرْسَلین رسولِ کریمﷺ نے فرمایا:  بندہ کہتا ہے ، میرا مال، میرا مال، حالانکہ اس کا مال فقط تین صورتوں میں ہے جو اس نے کھاکر ختم کر دیا، یا پہن کر بوسیدہ کردیا یا (ﷲﷻ کی راہ میں) دے کر ذخیرہ کرلیا، اور جو ان کے علاوہ ہے وہ تو اسے لوگوں کے لیے چھوڑ کر جانے والا ہے ۔

مشکوٰۃ 5166 (صحیح)

علاماتِ قیامت: وقت میں برکت نہ رہےگی

بِسْمِ اللّٰهِ الرَّحْمٰنِ الرَّحِیْمِ

رحمتِ عالم شافع روزِ محشر حضرت محمد مصطفٰیﷺ نے فرمایا: قیامت قائم نہیں ہوگی حتیٰ کہ زمانہ قریب آجائے گا تو سال مہینے کی طرح، مہینہ جمعہ (سات دن) کی طرح، جمعہ (یعنی ہفتہ) ایک دن کی طرح، دن گھنٹے کی طرح اور گھنٹہ آگ کے شعلے کی طرح ہو گا۔

مشکوٰۃ 5448 (صحیح )

مومن کا ہر معاملہ بھلائی کا ہوتا ہے

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریمﷺ نے فرمایا:  مومن کا معاملہ عجیب ہے۔ اس کا ہر معاملہ اُس کے لیے بھلائی کا ہے، اور یہ بات مومن کے سوا کسی اور کو میسر نہیں۔ اسے خوشی اور خوشحالی ملے تو شُکر ادا کرتا ہے اور یہ اُس کے لیے اچھا ہوتا ہے اور اگر اسے کوئی نُقصان پہنچے تو ( ﷲﷻ کی رضا کے لیے) صبر کرتا ہے، یہ ( بھی ) اس کے لیے بھلائی ہوتی ہے ۔ 

صحیح مسلم 7500(صحیح)

غلطیوں (گناہوں) کو زائل کرنے والے کلمات

بِسْمِ ﷲِ الرَّحْمٰنِ الرَّحِيْمِ

نبيِ رحمتﷺ نے ایک شاخ پکڑی، اس کو ہلایا، لیکن اس سے پتے نہ جھڑے، پھر ہلایا، لیکن پھر بھی پتے نہیں جھڑے، پھر اس کو ہلایا تو اس کے پتے جھڑ گئے، رسولِ کریم ﷺ نے فرمایا: بیشک سُبْحَانَ اللّٰہِ، اَلْحَمْدُ لِلّٰہِ، لَا اِلٰہَ إِلَّا اللّٰہُ، اَللّٰہُ أَکْبَرُ، یہ کلمات غلطیوں کو ایسے زائل کرتے ہیں، جیسے درخت اپنے پتے گرا دیتا ہے۔ 

مسند احمد 5453

خاوند کی ناشکری سے بچنے کی تلقین

بِسْمِ اللّٰهِ الرَّحْمٰنِ الرَّحِیْمِ

سیدہ اسما بنت یزید انصاریہ ؓ کہتی ہیں کہ نبی کریمﷺ ہمارے پاس سے گزرے اور ہم کچھ خواتین بیٹھی ہوئی تھیں، آپﷺ نے ہمیں سلام کہا اور پھر فرمایا: خوشحال لوگوں کی طرح ناشکر ی کرنے سے بچنا۔ ہم نے کہا: اے اللہ کے رسولﷺ ! خوشحال لوگوں کی ناشکری کیا ہوتی ہے؟ آپﷺ  نے فرمایا: ممکن ہے کہ تم عرصہ دراز تک اپنے والدین کے پاس بے شوہر کی زندگی گزارتی رہو، پھر ﷲﷻ تمھیں خاوند عطا کرے اور (اس کے ذریعے) اولاد کی نعمت بھی دے، لیکن تم کسی دن غصے میں آکر (خاوند کو) یہ کہہ دو کہ میں نے تو تیرے پاس کوئی خیر و بھلائی دیکھی ہی نہیں۔  

مسند احمد 7113 (صحیح)

یومِ جمعہ کی فضیلت

بِسْمِ ﷲِ الرَّحْمٰنِ الرَّحِيْمِ

نبی کریم ﷺ نے فرمایا: بیشک جمعہ کا دن تمام دنوں کا سردار اور ﷲﷻ کے نزدیک سب سے زیادہ عظمت والا دن ہے، اس کا درجہ اللہ تعالٰی کے نزدیک عید الاضحی اور عید الفطر سے بھی زیادہ ہے، اس کی پانچ خصوصیات ہیں: ﷲ نے اسی دن آدم علیہ السلام کو پیدا فرمایا، اسی دن ان کو روئے زمین پہ اتارا، اسی دن ﷲ نے ان کو وفات دی، اور اس دن میں ایک ایسی گھڑی ہے کہ بندہ اس میں جو بھی مانگے ﷲ اسے دے گا جب تک کہ حرام چیز کا سوال نہ کرے، اور اسی دن قیامت آئے گی، جمعہ کے دن ہر مقرب فرشتہ، آسمان، زمین، ہوائیں، پہاڑ اور سمندر ( قیامت کے آنے سے ) ڈرتے رہتے ہیں ۔

سنن ابن ماجہ 1084 (صحیح)

قول و فعل میں تضاد کا عذاب

بِسْمِ اللّٰهِ الرَّحْمٰنِ الرَّحِیْمِ

صادق و امین رسولِ کریم‌ﷺ نے فرمایا:  معراج کی رات میں کچھ ایسے لوگوں کے پاس سے گزرا جن کے ہونٹ آگ کی قینچیوں سے کاٹے جارہے تھے، میں نے کہا: جبریل ! یہ کون لوگ ہیں؟ انہوں نے کہا : یہ آپﷺ کی امت کے خطیب حضرات ہیں، جن کے قول و فعل میں تضاد تھا۔

مشکوٰۃ 4802 (صحیح)

مومنوں میں باہم محبت وشفقت کا بیان

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا: آپ مؤمنوں کو باہم رحمت و مہربانی کرنے، باہم محبت اور معاونت کرنے میں، جسم کی مانند پائیں گے، جب کوئی عضو تکلیف میں مبتلا ہوتا ہے تو اس کی وجہ سے اس کا سارا جسم بیداری اور بخار میں مبتلا رہتا ہے۔

مشکوٰۃ 4953(متفق علیہ)

جب تجھے غصہ آجائے تو خاموش ہوجا

بِسْمِ اللّٰهِ الرَّحْمٰنِ الرَّحِیْمِ

سرورِ کائنات فخرِ موجودات احمد مجتبیٰ محمد مصطفٰی ﷺ ‌ نے فرمایا: لوگوں کو علم سکھاؤ اور آسانیاں پیدا کرو اور مشکلات پیدا نہ کرو، اور جب تجھے غصہ آجائے تو خاموش ہوجا، اور جب تجھے غصہ آجائے تو خاموش ہوجا، اور جب تجھے غصہ آجائے تو خاموش ہوجا۔ 

مسند احمد 253 (صحیح)

کرو مہربانی تم اہلِ زمین پر

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریم ﷺ  نے فرمایا: جو لوگوں پر رحم نہیں کھاتا ﷲﷻ بھی اس پر رحم نہیں کھاتا۔

صحیح البخاری 7376 (صحیح)

جمائی لینے کا بیان

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی محبوب ربُّ العالمین حضرت محمد مصطفٰی ﷺ نے فرمایا: جب تم میں سے کسی کو جمائی آئے تو وہ اپنا ہاتھ اپنے منہ پر رکھے کیونکہ شیطان (منہ میں ) داخل ہوجاتا ہے ۔

مشکوٰۃ 4737(صحیح)

چاشت کی نماز کا بیان

بِسْمِ اللّٰهِ الرَّحْمٰنِ الرَّحِیْمِ

سیدہ عائشہ ‌رضی ‌اللہ ‌عنہا سے سوال کیا گیا کہ رسولِ کریم ‌صلی ‌اللہ ‌علیہ ‌وآلہ ‌وسلم چاشت کی نماز کتنی رکعتیں پڑھا کرتے تھے؟ انھوں نے کہا: آپ ‌ﷺ چار رکعت پڑھا کرتے تھے اور اس سے زیادہ بھی پڑھتے، جتنا اللہ تعالیٰ کو منظور ہوتا۔ 

مسند احمد 2277(صحیح)

جمعہ کے دن غُسل کرنے کا بیان

بِسْمِ اللّٰهِ الرَّحْمٰنِ الرَّحِیْمِ

سرورِ کونین سید الانبیاء حضرت محمد مصطفٰی ﷺ نے فرمایا:  جمعہ کے دن غُسل کرنا ہر بالغ شخص پر واجب ہے ۔

مشکوٰۃ 538(متفق علیہ)

چھینکنے والے کا الحمدللہ کہنا

بِسْمِ اللّٰهِ الرَّحْمٰنِ الرَّحِیْمِ

نبيِ رحمت ﷺ کے پاس دو اصحاب چھینکے۔ نبی کریم ﷺ نے ایک کا جواب یرحمک اللہ( اللہ تم پر رحم کرے ) سے دیا اور دوسرے کا نہیں۔ آپ ﷺ سے اس کی وجہ پوچھی گئی تو فرمایا کہ اس نے الحمدللہ کہا تھا ( اس لیے اس کا جواب دیا ) اور دوسرے نے الحمدللہ نہیں کہا تھا۔ چھینکنے والے کو الحمدللہ ضرور کہنا چاہئے اور سننے والوں کو یرحمک اللہ۔ 

صحیح البخاری 6221 (صحیح)

جَزَاكَ اللَّهُ خَيْرًا کہنے کی اہمیت

بِسْمِ اللّٰهِ الرَّحْمٰنِ الرَّحِیْمِ

ابو القاسم حضرت محمد مصطفٰی ﷺ نے فرمایا: جس شخص کے ساتھ کوئی بھلائی کی گئی اور اس نے بھلائی کرنے والے سے جَزَاكَ اللَّهُ خَيْرًا ”ﷲﷻ تم کو بہتر بدلا دے“ کہا، اس نے اس کی پوری پوری تعریف کر دی

جامع الترمذی 2035(صحیح)

زبان پر ہلکا اور میزان میں بھاری ذکر

بِسْمِ اللّٰهِ الرَّحْمٰنِ الرَّحِیْمِ

خیرُالبشر رسولِ کریم ﷺ نے فرمایا: ’’ دو کلمے ہیں جو زبان پر ہلکے ہیں اور میزان میں بھاری ہیں اور ﷲﷻ کو بہت محبوب ہیں: 

سُبْحَانَ اللَّهِ وَبِحَمْدِهٖ سُبْحَانَ اللَّهِ الْعَظِيمِ

 ﷲ ہر اس چیز سے پاک ہے جو اس کے شایان شان نہیں اور سب حمد اسی کو سزاوار ہے ، ﷲ ہر اس چیز سے پاک ہے جو اس کے شایان شان نہیں اور عظمت کی ہر صفت سے متصف ہے ۔

صحیح مسلم6846 (صحیح)

بارش میں گھر پر نماز ادا کرنے کا بیان

بِسْمِ اللّٰهِ الرَّحْمٰنِ الرَّحِیْمِ

حضرت جابر رضی الله عنہ کہتے ہیں کہ ہم لوگ نبی اکرم صلی الله علیہ وسلم کے ساتھ ایک سفر میں تھے کہ بارش ہونے لگی تو آپ ﷺ نے فرمایا: ”جو چاہے اپنے ڈیرے میں ہی نماز پڑھ لے“۔

جامع الترمذی 409 (صحیح)

تکالیف گناہوں کا کفارہ بنتی ہیں

بِسْمِ اللّٰهِ الرَّحْمٰنِ الرَّحِیْمِ

حضرت عبداللہ بن مسعود ؓ نے بیان کیا کہ میں رسولِ کریم ﷺ کی خدمت میں جب آپ بیمار تھے حاضر ہوا۔ میں نے آپ کا جسم چھوا، آپ کو تیز بخار تھا۔ میں نے عرض کیا آپ کو تو بڑا تیز بخار ہے یہ اس لیے ہوگا کہ آپ کو دگنا ثواب ملے گا۔ نبی اکرم ﷺ نے فرمایا کہ ہاں اور کسی مسلمان کو بھی جب کوئی تکلیف پہنچتی ہے تو اسکے گناہ اس طرح جھڑ جاتے ہیں جیسے درخت کے پتے جھڑ جاتے ہیں۔ 

صحیح البخاری 5661 (صحیح)

جمعہ کو قبولیتِ دُعا کی ممکنہ گھڑی

بِسْمِ ﷲِ الرَّحْمٰنِ الرَّحِيْمِ.

ہمارے پیارے نبی حضرت محمد مصطفٰیﷺ نے فرمایا: ”جمعہ کے روز اس گھڑی کو جس میں دُعا کی قبولیت کی اُمید کی جاتی ہے عصر سے لے کر سورج ڈوبنے تک کے درمیان تلاش کرو“۔

جامع الترمذی 489 (صحیح)

مال و دولت کی محبت کا بیان

بِسْمِ ﷲِ الرَّحْمٰنِ الرَّحِيْمِ

حضرت آمنہ کے لعل رسولِ کریمﷺ نے فرمایا: اگر انسان کے لیے مال کی دو وادیاں ہوں تو وہ تیسری تلاش کرتا ہے، انسان کے پیٹ کو صرف (قبر کی) مٹی ہی بھرے گی، اور ﷲﷻ توبہ کرنے والے شخص کی توبہ قبول فرماتا ہے۔

مشکوٰۃ 5273 (صحیح)

باجماعت نماز ترک کرنے پر سخت وعید

بِسْمِ اللّٰهِ الرَّحْمٰنِ الرَّحِیْمِ

وجہِ تخلیق کائنات حضرت محمد مصطفٰی ﷺ نے فرمایا: میں نے تو یہ ارادہ کرلیا تھا کہ نماز کی جماعت قائم کرنے کا حکم دے کر خود اُن لوگوں کے گھروں میں جاؤں جو جماعت میں حاضر نہیں ہوتے اور اُن کے گھر کو جلا دوں۔ 

صحیح البخاری 2420 (صحیح)

دورانِ نماز اِدھر اُدھر دیکھنےکا بیان

بِسْمِ ﷲِ الرَّحْمٰنِ الرَّحِيْمِ

امام المرسلین رسولِ کریمﷺ نے فرمایا: اللہ تعالٰی حالتِ نماز میں بندے پر اُس وقت تک متوجہ رہتا ہے جب تک کہ وہ اِدھر اُدھر نہیں دیکھتا ہے، پھر جب وہ اِدھر اُدھر دیکھنے لگتا ہے تو ﷲﷻ اس سے منہ پھیر لیتا ہے ۔ 

سنن ابوداؤد 909 (صحیح)

نقائص پر پردہ ڈالنے کی ترغیب

بِسْمِ اللّٰهِ الرَّحْمٰنِ الرَّحِیْمِ

سرورِ کائنات فخرِ موجودات احمد مجتبیٰ محمد مصطفٰیﷺ نے فرمایا: جو بندہ بھی دنیا میں کسی بندے کی پردہ پوشی کرے گا، ﷲﷻ قیامت والے دن اس کی پردہ پوشی کرے گا۔ 

مسند احمد 9131 (صحیح)

قناعت کا بیان

بِسْمِ اللّٰهِ الرَّحْمٰنِ الرَّحِیْمِ

ہمارے پیارے نبی حضرت محمد مصطفٰی ﷺ نے فرمایا: ( دنیا میں ) اپنے سے نیچے والے ( کم مال والے ) کو دیکھو، اپنے سے اوپر والے کو نہ دیکھو، اس سے یہ ہوگا کہ تم ﷲﷻ کی نعمت کو حقیر نہ سمجھو گے ۔

سنن ابنِ ماجہ 4142 (صحیح)

کامیاب و بامراد انسان کی صفات

بِسْمِ اللّٰهِ الرَّحْمٰنِ الرَّحِیْمِ

رَحْمَۃً لِّلْعَالَمِیْن رسولِ کریمﷺ نے فرمایا:  وہ انسان کامیاب و بامراد ہوگیا جو مسلمان ہوگیا، اور اسے گزر بسر کے بقدر روزی ملی، اور ﷲﷻ نے اسے جو دیا اس پر قناعت کی توفیق بخشی۔

صحیح مسلم 2426 (صحیح)

ذکر کے مخصوص کلمات کی فضیلت

بِسْمِ اللّٰهِ الرَّحْمٰنِ الرَّحِیْمِ

صادق و امین رسولِ کریم‌ﷺ نے فرمایا: بیشک اللہ تعالٰی نے چار کلمات پسند کیے ہیں: سُبْحَانَ اللّٰہِ، اَلْحَمْدُ لِلّٰہِ، لَا اِلٰہَ إِلَّا اللّٰہُ، اَللّٰہُ أَکْبَرُ۔ جس نے سُبْحَانَ اللّٰہِ کہا، اس کے لیے بیس نیکیاں لکھی جائیں گی اور بیس برائیاں معاف کر دی جائیں گی، جس نے اَللّٰہُ أَکْبَرُ کہا، اس کے لیے بھی اتنا ثواب ہوگا، جس نے لَا اِلٰہَ إِلَّا اللّٰہُ کہا، اس کے لیے بھی اتنا ہی اجرو ثواب ہوگا اور جس نے اپنے دل سے اَلْحَمْد لِلّٰہِ رَبِّ الْعَالَمِینَ کہا، اس کے لیے تیس نیکیاں لکھی جائیں گی اور تیس برائیاں معاف کر دی جائیں گی۔ 

مسند احمد 5450 (صحیح)

غصے کا علاج

بِسْمِ اللّٰهِ الرَّحْمٰنِ الرَّحِیْمِ

دو آدمی آپس میں گالی گلوچ کر رہے تھے کہ ایک شخص کا منہ سرخ ہو گیا اور گردن کی رگیں پھول گئیں۔ نبيِ کریم ﷺ نے فرمایا کہ مجھے ایک ایسا کلمہ معلوم ہے کہ اگر یہ شخص اسے پڑھ لے تو اسکا غصہ جاتا رہے گا۔ فرمایا

أَعُوذُ بِاللّٰہِ مِنَ الشَّیطَانِ الرَّجِیم.‏

 ”میں پناہ مانگتا ہوں اللہ کی شیطان سے۔“ تو اس کا غصہ جاتا رہے گا۔

صحیح البخاری 3282 (صحیح)

شک و شبہ کے مقامات پر وضاحت کی اہمیت

بِسْمِ اللّٰهِ الرَّحْمٰنِ الرَّحِیْمِ

رسول اکرم ﷺ اپنی ایک بیوی کے ساتھ کھڑے تھے کہ وہاں سے ایک آدمی کا گزر ہوا، آپ ﷺ نے فرمایا: اے فلاں! یہ میری بیوی ہے۔ اس نے کہا: اے اللہ کے رسولﷺ ! مجھے کسی کے بارے میں تو گمان ہوسکتا ہے، لیکن آپﷺ کے بارے میں تو میں کسی بدگمانی میں مبتلا نہیں ہوسکتا، آپ ﷺ نے فرمایا: بیشک شیطان، ابن آدم میں خون کی طرح گردش کرتا ہے۔

(بد گمانیاں پیدا کرسکتا ہے)

مسند احمد9853 (صحیح)

پاکیزگی کا بیان

بِسْمِ اللّٰهِ الرَّحْمٰنِ الرَّحِیْمِ

خَاتَمُ الْمُرْسَلین رسولِ کریم ﷺ نے فرمایا:  جب تم میں سے کوئی نیند سے بیدار ہو تو وہ اپنا ہاتھ برتن میں نہ ڈالے حتیٰ کہ اسے تین مرتبہ دھولے، کیونکہ وہ نہیں جانتا کہ اس کے ہاتھ نے رات کہاں بسر کی ۔

مشکوٰۃ 391 (متفق علیہ)

مسلمان کے عیب پر پردہ ڈالنے کا بیان

بِسْمِ اللّٰهِ الرَّحْمٰنِ الرَّحِیْمِ

صادق و امین رسولِ کریم‌ﷺ نے فرمایا: ”جس نے کسی مومن سے دنیا کی تکلیفوں میں سے کوئی تکلیف دور کی ﷲﷻ اس کے آخرت کی تکلیفوں میں سے کوئی تکلیف دور کرے گا، اور جس نے کسی مسلمان کی پردہ پوشی کی تو اللہ دنیا و آخرت میں اس کی پردہ پوشی فرمائے گا، اللہ بندے کی مدد میں لگا رہتا ہے جب تک بندہ اپنے بھائی کی مدد میں لگا ہے“۔ 

جامع الترمذی 1425  (صحیح)